Ziman û raman du tiştên gelek girîng in di jîyana miletan da. Feylezofê alman Heidegger dibêje, "Ziman mala ramanê ye." Lê em dikarin bibêjin ku ziman çekê neteweyan e, yan jî welat û warê miletan e. Rewşa ku bi seh û rahê miletan hatîye xemilandin, nîşana neteweperwerî, niştimanperwerî û milîbûyînê ye. Ziman ji hacetên herî mezin ê daxuyanî, jîyandin û domandina vê ruh û seha milîye. Zimanê axiftin û nivîsandinê, milet bi hev ra girê dide û dixe girêk. Zimanê axiftinê; ew zimanê rojane û navmalî ye ku em û kesên li derveyî me, ji hev fêm dikin û pêwendîyên bi hev ra dikarin daynin. Lê zimanê nivîsandinê zêdetir ji bo agahdarî û zanyarîyê ye. Hacetên zimanê nivîsandinê jî rojname, kovar û kitêb in. Lewra cîyê wan di jîyana cîvakî da gelekî girînge.